ನಿನ್ನನ್ನು ನಾನು ಏನಂತ ಕರೆಯಲಿ

ಗೆಳೆಯ, ನಿನ್ನನ್ನು ನಾನು ಏನಂತ ಕರೆಯಲಿ ? ಹಿತೈಷಿ ಎನ್ನಲಾ, ಅಸಹಾಯಕ ಎನ್ನಲಾ ಅಥವಾ ದ್ರೋಹಿ ಎನ್ನಲಾ .ನನಗೆ ಗೊಂದಲವಾಗುತ್ತಿದೆ. ಅಂದು ನಾನಾಗಿಯೇ ನಿನ್ನ ಮಾತಾಡಿಸಿ , ನಿನ್ನ ಗೆಳೆತನ ಬಯಸಿ ಬಂದೆ. ಆದರೆ ನೀನು ಈಗ ಬೇಕಂತಲೆ ದೂರ ಹೋಗ್ತಾ ಇದ್ದೀಯ. ನಿನ್ನ ಪಾಲಿಗೆ ನಾನು ಬಯಸದೇ ಬಂದ ಭಾಗ್ಯಾನಾ, ಅಥವಾ ನನ್ನ ಪಾಲಿಗೆ ನೀನು ನಿಲುಕದ ನಕ್ಷತ್ರನಾ. ಹೇಳು ಗೆಳೆಯ ಎಲ್ಲಿರುವೆ ನೀನು ಮೋಡದ ಮರೆಯಲ್ಲಿ. ಆಗೆಲ್ಲಾ ನಿನ್ನ ಒಂದು ನಗುವಿಗೆ, ಮಧುರ ಮಾತಿಗೆ ನಾನು ಎಸ್ಟು ಕಾಯ್ತಾ ಇದ್ದೆ. ಎಲ್ಲಿ ಸುತ್ತ ಬೇಕಿದ್ದರೂ ನೀನಿರುತ್ತಿದ್ದೆ ಜೊತೆ ಜೊತೆಯಲಿ. ನಾ ಒಪ್ಪಲು ನೀ ಅಪ್ಪುತ್ತಿದ್ದೆ, ತುಂಬಾ ಖುಷ್ ಆದಾಗ ಒಮ್ಮೊಮ್ಮೆ ಅದೇ ಜೋಶ್ ನಲ್ಲಿ ತುಂಬಾ ಮುದ್ಡಿಸುತ್ತಿದ್ದೆ. ಹಾಗೆ ನನ್ನ ಭಾವನೆಗಳಿಗೆ ಅಷ್ಟು ಚೆನ್ನಾಗಿ ಸ್ಪಂದಿಸುತಿದ್ದ ನೀನು ಇದ್ದಕ್ಕಿದ್ದಂತೆ ಯಾಕೆ ದೂರ ಹೋಗ್ತಿದಿಯ. ನಿನ್ನ ಸಮಸ್ಯೆ ಏನಂತ ನನಗೆ ಗೊತ್ತು, ನಿನ್ನ ದುಡಿಮೆ ಕಡಿಮೆ ಅಂತ ತಾನೇ ನೀನು ದೂರ ಹೋಗ್ತಿರೋದು. ನಾನ್ಯಾವತ್ತಾದರೂ ನಿನ್ನ ಸಂಪಾದನೆ ಎಷ್ಟು ಅಂತ ಕೇಳಿದ್ದೇನಾ ? ನನ್ನ ದೃಷ್ಟಿಯಲ್ಲಿ ಪ್ರೀತಿಗೆ ಹಣ ಮುಖ್ಯ ಅಲ್ಲ. ಪ್ರೀತಿಸುವಂಥ ಗುಣ, ಪ್ರೀತಿಸುವ ಹೃದಯ ಮುಖ್ಯ ಅಷ್ಟೇ . ಬೇಕಿದ್ದರೆ ನಾನೇ ಉಳಿಸಿಟ್ಟ ಹಣ ಇದೆ, ಸಾಲದಿದ್ದರೆ ನನ್ನಲಿಷ್ಟು ಒಡವೆ ಇದೆ, ಬೇಕಾ ಹೇಳು ! ನನಗೆ ಐಶ್ವರ್ಯ ಬೇಡ, ನಿನ್ನ ಒಲವಿನ ಆಸರೆ ಇದ್ದರಷ್ಟೇ ಸಾಕು. ನಮ್ಮದು ಬೇರೆ ಬೇರೆ ಜಾತಿ ನಿಜ, ಅದಲ್ಲದೇ ನಿಮ್ಮನೇಲಿ ತುಂಬಾ ಸಂಪ್ರದಾಯ, ಸಿಕ್ಕಾಪಟ್ಟೆ ಕಟ್ಟುಪಾದು ಅಂತಲೂ ಗೊತ್ತು. ಆದರೆ ನಿನಗೋಸ್ಕರ ನಾನು ಬದಲಾಗುತ್ತೇನೆ. ನಿಮ್ಮ ಅಪ್ಪ ,ಅಮ್ಮ, ಮನೆಯವರಿಗೆಲ್ಲಾ ಹೊಂದಿಕೊಂಡು ಬಾಳೋ ತಾಳ್ಮೆ ರೂಡಿಸಿಕೊಳ್ಳುತ್ತೇನೆ. ನಮ್ಮ ಮನೆಯ ಬಗ್ಗೆ ತಲೆ ಕೆಡಿಸ್‌ಕೋಬೇಡ, ಅವರನ್ನೆಲ್ಲಾ ಸಂಭಾಳಿಸೋದು ನನಗೆ ಗೊತ್ತು. ಯೋಚಿಸಬೇಡ, ಮನಸು ಮಾಡು ನಾನು ನಿನ್ನವಳು ಆಗುತ್ತೇನೆ . ಯಾರೂ ಒಪ್ಪದಿದ್ದರೆ ಎಲ್ಲಾದರೂ ಮದುವೆ ಆಗಿ ಸ್ವಲ್ಪ ದಿನ ದೂರ ಇರೋಣ ಇಬ್ರು ಜೊತೆಲಿ, ಆಮೇಲೆ ಎಲ್ಲಾ ತನ್ನಿಂದ ತಾನೇ ಸರಿ ಹೋಗ್ತದೆ. ಹುಡುಗಿಯಾಗಿ ನಾನೇ ಇಷ್ಟು ಹೇಳಿದರೂ ಹಿಂಜರಿದೆಯಲ್ಲ ಗೆಳೆಯ ಯಾಕೆ ? ಪ್ರೀತಿಸಿದ ಹುಡುಗಿ ಯಾರ್ ಜೊತೆಲೋ ಹೋದ್ಲು ಎಂಬ ಕಳಂಕ ಬರುತ್ತದೆ ಎಂಬ ಆತಂಕವಿತ್ತಾ ?

ನೀವು ಹುಡುಗರು ಏನೇ ಆದ್ರೂ ಹೊರಗಡೆ ಸುತ್ತ ಬಹುದು, ಫ್ರೆಂಡ್ಸ್ ಜೊತೆ ಬೆರೆಯಬಹುದು, ಹಾಗೆ ನನ್ನ ಮರೆಯಲೂ ಬಹುದು. ಆದರೆ ನಾನು ಹುಡುಗಿ ಕಣೋ, ಮರೆಯೋದು ಕಷ್ಟ. ನಮ್ಮಿಬ್ಬರನ್ನು ಒಟ್ಟೊಟ್ಟಿಗೆ ನೋಡಿದ ಜನ ಮರೆಯಲು ಬಿಡೋದು ಇಲ್ಲಾ. ಈ ಪ್ರೀತಿಯ ಮರೆತು ಬಾಳೋದು ಹೇಗೆ ನೀನೇ ಹೇಳು. ನಮ್ಮನೇಲಿ ನನಗೆ ಬೇರೆ ಹುಡುಗನನ್ನು ನೋಡ್ತಿದಾರೆ, ದೊಡ್ಡ ಕಂಪನಿಯಲ್ಲಿ ದೊಡ್ಡ ಸಂಬಳದವ. ಆದರೆ ಅದ್ಯಾವುದೂ ನಿನ್ನ ಪ್ರೀತಿಗೆ ಸಾಟಿಯಾಗದು. ಇನ್ನಾದರೂ ನೀ ಬರದೇ ಹೋದರೆ ನಾನು ಬೇರೆ ಮನೆಯ ಹೊಸ್ತಿಲು ತುಳಿಯಬೇಕಾಗುತ್ತದೆ. ಆದರೆ ನೆನಪಿರಲಿ, ಆ ಮನೆಯ ಅಂಗಳದಲ್ಲಿ ದಿನಾ ನಾನಿಡುವ ರಂಗೋಲಿ ಯಲ್ಲಿ ನನಗೆ ಕಾಣಿಸೋದು ನಿನ್ನ ಒಲವ ಚೆಲುವಿನ ಚಿತ್ತಾರವೇ. ಇಷ್ಟು ಹೇಳಿದ ಮೇಲೂ ನೀನು ದೂರ ಉಳಿದರೆ ನಿನ್ನಿಷ್ಟ.ಕೊನೆಗೂ ದೂರ ಆಗುವುದೇ ನಿನಗೆ ಅನಿವಾರ್ಯವಾದರೆ, atleast ಒಮ್ಮೆ ಬಳಿ ಬಂದು ಹೇಳಿ ಹೋಗು ಕಾರಣ ಇಂತೀ ಎಂದಿಗೂ ನಿನ್ನವಳೇ ಊರ್ಮಿಳಾ....